2015 年由 日本一会社 推出嘅战棋游戏《魔界战记 5》，喺 2017 年登录埋 Switch；而 Switch 中文化版本亦都系日前公开发售。
你可能会话“PS4 都有中文版啊，而家先出 Switch 中文化会唔会太迟啊？”我又唔系咁认同架，《魔界战记 5》系一只非常多元化嘅战棋游戏，关卡多、任务多；而想刷钱、刷技能或者刷 Lv，都需要玩家投放大量时间心机去育成角色同埋职业！所以出落手提机 Switch 度的话，对于唔系好多时间打机嘅朋友黎讲（举手）相信系好消息啊～
《魔5》嘅故事背景，简单黎讲，就系魔界大战！魔界入面有分唔同种族部落同势力，今集嘅 Boss 魔帝“暗邪沃伊德”到处侵略魔界，男主角奇力亚就挺身而出想对抗魔帝；女主角雪拉菲娜系魔界富二代（笑），原本被父母许配比“暗邪沃伊德”，因为厌恶呢个安排所以离家出走，结果一次危难中被奇力亚所救。故事就系以两位为中心。
不过游戏重点，毕竟系“战棋系统”嘅部份，所以剧情同对白都系轻松带少少恶搞中二成分为主，绝对唔会出现啲咩悲壮嘅场景……或者因为游戏着重嘅，系“趣味”嘅部份，所以无论系人设、对白、剧情，偶尔都几无厘头的
例如女主角雪拉菲娜成日见到男主角同异性就想媚惑人地，我明官方系想将佢打造成“小恶魔、魔性之女”嘅呢种形象，不过正因为大部份人物角色嘅性格太过个人主义，我反而唔系好感受到呢班人之间嘅牵绊喺边度……
如果唔系太介意人物关系图、净系想专心打战棋游戏嘅朋友，就绝对会享受呢个 Game 啦（笑）！《魔5》嘅关卡极多，净系要打爆一轮都需要唔少时间；加上 Switch 版系会免费收录 PS4 版所有 DLC 的，而关卡入面，又会好似《机战》咁有 Bonus 条件可以解锁；同时，游戏入面仲可以接好多任务需要打关卡时挑战……如果你目标系想挑战 100％ 完成游戏嘅朋友，我谂你日煲夜煲都要玩一段长时间，超抵玩！
点解话系初心感想？因为我目前净系玩咗头二十几关（中途挂住刷任务同埋升角色，打黎打去𠮶几关）
战斗方面绝对系游戏嘅重点！我本身唔系战棋游戏嘅爱好者，净系有玩开《机战》系列；不过，当然我唔会拎两者黎做比较啦（笑）《魔5》喺 PS4 上推出时其实我都有玩过，但系始终唔钟意用大屏幕黎玩非动作类游戏，所以好对唔住咁中途弃 Game；不过而家用 Switch 玩，我反而有心机玩咗好多（我系几乎唔会插 DOCK 连 HDMI 落 MON 玩𠮶种人 ）
唔知大家有无同感呢？我觉得用手提机玩呢类型游戏嘅时候，感觉更有凝聚力，简单啲讲句就系更易一眼关七，可能系心理因素影响啦……
画面方面就无话有咩改善，因为 PS4 版时已经做得唔错，动作或者指令操控都好流畅；而角色武器、技能等要素，都系需要日积月累嘅战斗去提升战力的。角色有分近攻、远攻、魔攻、治愈系，职业多到好似打 OLG 咁（笑）
唔同职业同等级，亦会影响战场上可以移动嘅格数、或者攻击范围有几远。例如忍者，可以一口气跳上高处、移动距离亦远；而主角奇力亚，力量虽大，但系移动距离一般；要点样善用角色嘅优劣之处、去发挥同一回合里面最强嘅攻击 COMBO、同时又要考虑敌人嘅招式同埋移动距离，以减少我方最大伤害值……呢个或者可以话系游戏中，玩家比自己最大嘅挑战。
特殊技都会有过场动画
输出最多嘅角色可以获得 Bonus EXP
头先提过 Switch 版有齐哂所有 DLC，除咗任务多咗之外，对于初心玩家黎讲，最大好处绝对系：
（1）会有初始能力较强嘅角色可以使用
（2）获得大量金钱作为初期储备（可以买装备、医疗角色、或者招兵买马揾新角色加入队伍）
不过有钱都唔系万能，角色如果想学新技能，就要多上战场杀敌，先会储到个人技能点去换取／升级技能……而当时我有朋友玩《魔5》啲角色系升到上 200 几 Lv 的 LOL 我只能讲：要称霸呢个游戏嘅道路真系好漫长！
Switch 版而家已经有繁体中文版，虽然大家上文可见我嘅截图有部份系日文，不过呢样只系我个人喜好而已，同埋可以比较一下中日文两个版本文字表达嘅分别！繁体中文版嘅翻译做得唔错，睇中文对白依然不失日文原文嘅趣味性，呢一点要赞。
虽然我离称霸游戏仲有一段好长嘅路，希望呢个初心感想，仍然能够简单同大家介绍到呢个游戏嘅特色！买黎随时有空时轻松一玩，绝对系一个唔错选择：）